Looking For Gold | Revolution stories Drill

Post edited 1:40 am – March 3, 2011 by sally ali

                                                                 ما نزلتش الميدان  

    كان نفسي في ثورة من زمان، كان نفسي اعلي صوتي و اهتف و اثور ضد الفساد و الإستبداد و الإستعباد. كان نفسي اصرخ و اطالب برحيل الدكتاتور، و إسقاط النظام، و تعديل الدستور. بل و اشتكي من تدني الأجور و غموض الأمور. بل و ابسط من كدة، كان نفسي اطالب بلقمة عيش لكل جعان، و كسوة للي بيبات عريان، و ميه نضيفة للي مالقاهاش و شرب مالمجاري، و أطلب مأوى للمتشردين في الشوارع و الحواري

كان دايماً جوايا رغبة انزل اتظاهر، لكن للأسف، عمري ما إتجرأت و عملتها. و لما كنت بتسإل ليه، كنت دايماً أجاوب و اقول إنهم علموني في البيت إني امشي جمب الحيط. فا بقيت لا بامشي في مظاهرات ولا بصوت في إنتخابات. قالولي مالكيش دعوة لا بأحزاب ولا بمجالس نواب. قالولي إحنا مالنا و مال الكلامم دة ما تخلينا في حالنا. كانت البلد من حوالينا بتتسرق، و بتتنهب، و بتتباع، و بتتقسم، و بتضيع مننا و إحنا ولا على بالنا

كان دايماً صوتي واطي و مبحوح و مجروح و مرعوش و مرعوب و ميت من الخوف. ما كنتش اقدر اعلي صوتي و اعترض لأن مصير المعارض بالنسبة لي كان معروف : مراقبة و تفتيش و تحقيق و ترهيب، ثم ضرب و تعذيب، ثم اعتقال، ثم إختفاء، يختفي و ما حدش يعرف له طريق جُرة. و تبقى عيشة اهله مُرة. كانوا بيخفوا أي واحد تسول له نفسه إنه يواجه الغلط و يقول له لأ… حتى ولو كان عنده حق

و رغم تحفظاتي و إعتراضاتي و تساؤلاتي، ما كنتش اقدر اشكك إن الحكم.. ديمقراطي.. و إن الريس… ديمقراطي، و إن الحزب.. وطني… و ديمقراطي. كان لازم اسبح بحمد قرارات البرلمان، و اعترف بنزاهة الإنتخابات في عهد سرور. كان لازم اشيد بتطور التعليم على إيد بدر و هلال اللي هلوا علينا بالنور. و اتباهى بأرباح البترول في عهد سامح فهمي اللي عيشنا في قصور. كان لازم اعمل نفسي مش واخدة بالي، إن الغالي، يوسف بطرس غالي، خفى اموالنا في اعمق الجحور. كان لازم اقول إن مصر في الخارج كان ليها صيت عشان اللي ماسك الخارجية كان أحمد ابو الغيط. كان لازم اضرب تعظيم سلام، و اقف تمام، لما اسمع إسم حبيب العادلي عشان ما اروحش في كَالابوش، ولا اترمي في اوضة ضلمة و ينهش في لحمي الوحوش. كان لازم احلف بإسم زكريا عزمي ابو عزم شديد، و عز ابو قوة حديد، و اعترف إن سياسة جمال كانت سياسة تجديد، و يوم ما أحلف بالشرف، احلف بشرف الشِريف، و بنضافة نظيف، و بثقافة الفنان فاروق حسني وزير التثقيف. كان لازم اطاطي و ابوس الأيادي زي عيشة عبد الهادي. و أقرا في كتب اشكال و الوان، بأمر مباشر من ماما سوزان. ما كانش ينفع اصدق اي كلام، أو أي إعلام، غير إعلامنا المصري، اللي الخبر عليه حصري، الخالي من التعتيم و التضليل و التشويش و التأليف و التخريف و التحريف. كان لازم أشهد إن الفقي خلاه جهاز عظيم، و متطور، و عصري. مالآخر كان لازم استسلم و اسلم بكل حاجة، و ما كانش ينفع انتقد أي وزير أو أي كبير

و فجأة، لقيت التوانسة ثاروا. قالوا كل اللي كان نفسي اقوله. قلت يا رب يكونوا المصريين إتأثروا و غاروا. قلت يا رب الشعب يقوم و يهب و يعلن قراره. و فاتت الأيام، و بدأ تداول الكلام. ماسيدجات، تليفونات، إيميلات، و الفيس بوك إتملى دعوات. اختاروا يوم 25 يناير يكون يوم ثورتنا. يوم عيد الشرطة اللي ياما عذبتنا و اهانتنا. يوم 25 يناير كل سنة كنت باحتفل بعيد ميلادي، لكن السنة دي، كان عيد بلادي. الشعب كله جابلي الهدية. الهدية كانت ثورة، غضب، إصرار، صمود. الشعب كله إتجمع في ميدان. دق الجرس و علّى الأدان، وحد الأديان، و اذاع البيان: قال مش هنمشي من المكان، و لما الكلمة بقت واحدة اتوحد الكيان. بس أنا ما نزلتش الميدان! آه، ما نزلتش الميدان. ما نزلتش لأن في واحد، مش هأذكر إسمه ولا صفته، منعني، و مسكني من إيدي اللي بتوجعني، لأنه، بإختصار، يعولني، هو واحد من الجيل الغلبان بتاع زمان. ما اقدرش اقول عليه سلبي ولا جبان. اصل هو بينتمي لجيل عاصر عبد الناصر و حلم بوحدة عربية، و عاش ايام السادات و حلم بالمروحة و الكاسيت الدابل و العربية، اما في عهد مبارك المبارك، كان ممنوع يحلم اساساً. بقت فكرة الأحلام نفسها بالنسبة له هايفة و تافهة و غبية. جيل سلم نمر. فقد الأمل. صهين و طنش و ضاع إحساسه بالزمن، و إحنا اللي دفعنا التمن. كان خايف عليا. خاف عليا من البلطجية و العُصبجية و الحصنة و الجمال و الحمار (اللي بعتهم طبعاً) و من القناصة. خاف لا تطخني رصاصة

ما نزلتش الميدان! بس ما سكتّش. ثرت ثورة عارمة، بس ثورتي كانت عالنت: عالفيس بوك و تويتر و يوتيوب و كل المواقع دية. كانت ثورة إلكترونية. و فجأة قطعولنا النت و الإتصال. فبقت ثورتي ثورة بلكونية جنونية. و ثورة ورقية. كتبت مقالات و اشعار و قصص و حكايات، و ألِفت ييجي مية أغنية. أول ما رجع النت، رجعت قعدت ورا الكيبورد. كتبت كل اللي في نفسي من غير ما استنى حد يرد. ناديت كل اللي في الميدان عن بعد. قلتلهم استمروا، انا معاكوا، شايفاكوا و حاسة بيكوا و مؤيداكوا و مشجعاكوا. كنت باقولهم انا كمان أريد إسقاط النظام. أنا كمان عاوزة حرية و كرامة إنسانية و عدالة إجتماعية. قلتلهم اوعوا حد فيكو يمشي. هو اللي لازم يمشي. أنا كمان زيكم باقول كفاية

التكنولوجيا خلتهم و هما في الميدان يشوفوا مقالاتي و كتاباتي و تعليقاتي و تشجيعاتي و تحميساتي. كنت باقوللهم استمروا يا رافعين راسي. يا أهلي و اصحابي و اخواتي. و فعلاً إستَمَروا و اصروا و استبسلوا و صمدوا لحد اما بسلامته تخلى. حسيت إن الهم انزاح، و أخيراً هنرتاح. نزلت ساعتها لأول مرة من البيت. لفيت الشوارع شارع شارع. زنجة زنجة. لقيت مظهر إحتفال مش عادي، رغم إني ساكنة في المعادي، اللي المفروض حي هادي. لقيت فرحة و مزيكا و أعلام و هتافات و سلامات و غنا و زغاريد و تنطيط و ناس ماعرفهش بتنادي. بتنادي بفرحة معاها دمع

كان يوم نصر لمصر عالغول، لكن الأفعى كان ليها ذيول و اذناب و فلول. فرقتنا و شتتتنا و غربتنا و موتتنا و فتنتنا و جننتنا. بس خلاص. زمن اليأس إنتهى. خلص خلاص. كل مصري هيمشي مرفوع الراس. هنعدي الأزمة، و هنفض الفوضى، و من هنا و رايح مش هنطاطي. من هنا و رايح مفيش صوت واطي. هنعلي صوتنا و نهتف و نزعق عشان حقنا. و هنغني. أنا هغني. لسة الأغاني ممكنة. علي صوتك. خليه يملى الأمكنة. لسة الأغاني ممكنة